Godthåb bådeforeningiminngaanniit puttasut 2887 miiterisut takitigipput taakkualu puttasunngortikkaanni 19-ipput immikkoortitissagaannilu 219-itut amerlatigalutik.

Puttasut sanalluagaapput ulluinnarnili atorneqarnerini silallu pissusaanniit aamma nungullariartortarlutik, taamaattumillu pigineqartut piujuaannarneq ajorput. Ukiut tamaasa immikkoortortat 20-iniit 25-it tungaannut amerlassusillit taarserneqartarput, immikkoortortanillu nutaanik sananeq ukiuunerani peqatigiiffiup quersuaani ingerlanneqartarluni.

Immikkoortortap ataatsip angissusaa tassaavoq (725cm x 244cm x 35cm) taannalu 15-1600kg-imik oqimaassuseqartarluni. Angissuseq aaliangersimasoq siniliuteriarlugu ilua qisunnik quassuttuunik immersorneqartarpoq immerneqareeraangallu ataa qulaaniittorlu krydsfinerinik matoorneqartarlutik. Puttasoq puttasinnaaniassammat flamingolersorneqarsimasarpoq, sillilikkallu qaavanut aamma atorneqarsimapput puttasoq quasattooqqunagu. Immikkoortortaqarfiit taakku quersuarmi suliarineqartut oqimaanneri peqqutigalugit kivittaarinermi taaliaat atorneqartarpoq, aputaajaatillu atorlugit inissisimaffissaannut iliartorneqartarlutik.

Puttasut immikkoortortaa ataaseq 35.000kr.-it missaannik naleqarpoq, taamaattumillu peqatigiiffimmut naleqartorujussuuvoq. Taamaammat pingaaruteqartorujussuuvoq puttaqutit paarilluarneqarnissaat. Tamannalu ingerlanneqarsinnaavoq iluamik angallatinik pituttuinikkut, tassa angallatip puttasoq attuusaaffiginissaa nungullariartortinneqarnissaalu pinaveersaartinneqarsinnaapput. Peqatigiiffimminngaanniillu aamma eqqumaffiginiarneqartarpoq puttasut sorliit umiatsianut annernut aammalu silarluttumi mallersumilu sorliit attuussaaffigitissallutik tulluarnerunersut.

Ukiut tamaasa puttasut qaqinneqartarput, tassungalu peqqutit assigiinngitsuupput. Soorlu ukiukkut immap sikusarnerata ilaasortagut angalaartartut angalaarniarnissaat ajornakusoortilertarpaat. Taassumalu aamma saniatigut ukiukkut anorersuartarnerata puttasut nungullartipallattarpaat, puttasummi immap naqqanut kisanut qajannaarneqartarput, taamaasilltillu sukkanerusumik nungullariartupallattarlutik. Aammattaaq aputip puttasullu qerinerisa kingunerisaanik puttasut oqimaassisarput ilaannikkullu imminnut puttatissinnaajunnaarlutik kivisarlutik. Ikaartarfiillu aamma sequmissinnaasarput puttasut ikaartarfiillu akornanni aalavallaartoqarnera peqqutaalluni. Aammattaarlu imminut akilersinnaaqaaq ukiunnginnerani puttasut qulakkeereernissaat, taamaattumillu novembarimi pingasunngornerit aappaanni nal. 08.00-inngortinnagu umiatsiat tamarmik qaqinneqareersimasariaqartarput.

Ukiut tamaasa peqatigiiffimmi nutaanik umiatsiaqalertarpoq. Ilaannikkut ilaasortat nutaajusarput ilaannili ilaasortaareersut umiatsiaqalertarput nutaanik – amertanertigullu umiatsiat anginerusarlutik. Peqatigiiffimmullu unammillernartuuvoq umiatsianut nutaanut inissiiffissamik nassaarniarnissaq. Umiatsiallu angineruleriartornerisa kingunerivaat ilaasortanngortussat nutaat inissakilliartornerat, tassami umiatsiat anginerit silinnerusaramik puttasunilu inissamik annertunerusumik pisariaqartitsisarlutik. Taamaattumik inissanik agguaaneq suliarujussuusinnaasarpoq taassumami aamma saniatigut ajoraluartumik suliassat ilagivaat ilaasortat inisisimaffissaminnik naammagisimaarinninnissaat.