Qipoqqaat mianeralugit alutorsaatigisartigit

Qipoqqaat aasarissilerneranut ilisarnaataapput, taamaalineranilu umiatsiamik angalaartarnerit aamma aallartinneqartarlutik. Qipoqqaat Nummiunit eqqaamiuinillu alutorsaatigineqartaqaat, ilaasalu qanillivillugit tikisertarlugit taamaalillutik Nuup kangerluani qipoqqaat umiatsiarpassuarnit qaninngoorneqartarlutik. Kisiannili uumasut taakku angisoorsuit alutornartullu mianeralugit alutorsaatigineqartariaqarput.

Qipoqqaat umiatsianit angallattunit sunnerneqartarput

Qipoqqaat umiatsianit sukkavallaartunit tikiserneqartarnerminnit qanoq sunnerneqartarnerat paasiniarlugu Pinngortitaleriffimmiunit misissuiffigineqarnikuuvoq. Misissuinerup paasinarsisippaa aqqaqattaakulanerulersartut, sukkanerusumik immap iluani ingerlaalersartut neriniartillutillu nalinginnaasumit sivikinnerusumik aqqaamasartut. Taamaalilluni paasinarsivoq arferit neriniarnerminni akornusersorneqartartut. Tamanna arfernut sunniuteqarsinnaavoq, tassami maani eqqatsinni kangerlummiinnerminni naammattumik puallarsimanngikkunik tamanna ungasissorsuarmut Caribiamut uterlugulu ingerlaarnissaannut malunniuteqarsinnaavoq. Peqatigisaanillu qipoqqaat pissusivimminnik pissusilersornerannik arajutsisoqarsinnaavoq, immaqalu aamma qipoqqaap namminiivilluni tikiserinissaraluanik qatangiinnartitsisoqarluni.

Arfernut akornusersuutaannginnerpaajusumik umiatsiamik tikiserisoqarnerani maleruarneqarsinnaasunik Visit Greenland Pinngortitaleriffillu suliaqarnikuupput, imaattut:

  • Arfeq 500 meterinik ungasitsigilerukku kigaallagit (malliortitsinnginnerussaatit).
  • Arfeq 50 meterinik qanitsigilerukku maskiinat ingerlaartitsiunnaartiguk imaluunniit qamiguk (maskiinat ilasaqattaarnerat arferit malussariffigisarmatigit).
  • Arfeq toraarlugu imaluunniit tunuaniit orninnagu.

ANGALAARLUARTARISI