Ukioq manna ukiuunera assut aputeqarsimallunilu issisiorfiusimavoq, tamannalu Godthåb Bådeforeningimut ajornartorsiortitsilaarsimavoq. Puttasut qaleriiaat imminnut nunamullu qerrussimapput. Puttasullu toqqavigisartagaata nalaaniittoq qaanngoq aamma assut sikoqarpoq, puttasullu wirerisartagaat aamma sikumiit kaanngartinneqarsinnaanatik. Immami siku 70 cm-it missaannik issutigisoq sequtserneqarsinnaagaluarpoq. Sequtserinissarlu naatsorsuutigineqarpoq påskip nalaani ingerlanneqassasoq sila, anori immallu tinittarnera ulittarneralu akornutaanngippata.
Maannakkullu allatut iliorsinnaannginnatta upernariartornissaa utaqqiinnartariaqaleqqavarput, nalunngikkaluarparput arlallit påskinnginnerani angallatiminnik aqqaarusukkaluartut, kisiannili maannakkumut naatsorsuutigaarput aatsaat puttasut siulliit apriilip naalernerani aqqarneqarnissaat.
Angallatit nunamiittut nalaanni aamma assut suli aputeqarpoq, piffiillu arlallit akornanni lastbiilertartut ajornartorsiutigivaat ilaasortat angallataasa nalaannut pinissartik. Tamatuma nalaani aputaajaanissaq kommunep akisussaaffigivaa, kisiannili nalunngilarput piffinni arlalinni GNC ApS-iminngaanniit aputaajaqquneqartut saniatigut aputaajaasartut, tamannalu Godthåb Bådeforningip ilaasortaasa assut qujaruppaat.
Tamatta nalunngilarput silarsuaq kisimi naalagaasoq, pisinnaaleriartuttalu piffissaq siulleq atorlugu puttasut aqqarneqarumaarput, taamaasillutalu tamatta sunngiffitsinni nuannareqisarput aallussinnaaleqqikkumaarlutigu.

Påskisiorluarisi.